Skip to main content

ANAK NG TAO: SINO NGA BA?

 



ANG MGA TITULO NI HESUS part 2

 

Kung ang titulong Kristo o Mesiyas ay nagmula sa bibig ng mga tao, at iniwasang banggitin ni Hesus para sa kanyang sarili, ang titulo na “Anak ng Tao” naman ay nagmula sa kanya lamang, maliban sa isang pagkakataon (Gawa 7).  Sa halos 80 beses na naisulat ito sa Mabuting Balita, palaging si Hesus ang bumabanggit nito kaya malakas ang kutob ng mga eksperto na ito ay batay sa tunay na kasaysayan at pag-alala ng mga alagad sa isang mahalagang detalye ng pangangaral ng Panginoon.

 

Sa lengguahe ng mga Hudyo, ang “anak ng tao” ay may simpleng kahulugan na “tao.” Ganito ang pakahulugan sa aklat ng propeta Ezekiel.  Sa iba pang aklat ng Lumang Tipan, ang kahulugan naman nito ay ang itinaas o itinanghal na tao (Job, mga Awit). Kay Daniel, ang “Anak ng Tao” ay puno ng simbolismo; ito ang kinatawan ng darating na Kaharian ng Diyos at ng kanyang mga banal (Dan 7), subalit ang Anak ng Tao dito ay walang mga personal o pansariling katangian. Sa panahon ni Hesus, ang titulong ito ay walang kalakip na pakahulugang kaugnay ng paniniwalang relihyoso ng mga tao. Madaling nagamit ng Panginoon ang titulong ito na para bang isang bugtong kung saan kapwa niya maipapahayag at maikukubli ang kanyang sarili.

 

Sa Mabuting Balita nina Marcos, Mateo at Lucas, ang Anak ng Tao ay tumutukoy sa mga karaniwang gawain ni Hesus sa lupa – nagpapatawad, nagtuturo, nagtutuwid, nag-aanyaya, nangangaral, nakikisama sa mga makasalanan, nananawagan sa pagbabagong-buhay. Sa paggamit ni Hesus dito ng titulong ito, sinasabi niyang siya ang tao na nakikiisa sa kapalaran ng mga tao, subalit isinugo din ng Diyos at taglay ang Espiritu ng Diyos dahil siya ay tanda ng darating na Kaharian ng Diyos. At kahit ganito siya, itatakwil siya ng kanyang kapwa-tao.

 

Ang isa pang makikita nating pagtalakay sa Anak ng Tao ay may kinalaman sa pagdurusa nito (Mk. 8, 9 at 10). Maaaring iniugnay ni Hesus ang titulong ito at ang tradisyon ukol sa Nagdurusang Lingkod ng Diyos na noon ay sikat sa kaisipang Hudyo. Inilarawan ni Hesus ang Anak na Tao bilang siyang magdadala ng kaganapan ng panahon subalit sa pamamagitan lamang ng kanyang pagiging dukha, itinakwil, tinuligsa at pinaslang; lutang na lutang dito ang isang nagbabagang tension.

 

Isa pang pagtalakay sa Anak ng Tao ay may kinalaman sa kanyang pagdating lulan ng mga ulap sa wakas ng panahon, taglay ang kapangyarihan (Mk. 13 at 14). Dito ang titulo ay gamit upang ipakita ang darating na kahalagahan ng mga salita at gawa ni Hesus; isang tanda ng kanyang kaganapang dadalhin sa daigdig.

 

Bilang “Anak ng Tao,” si Hesus ang darating na kinatawan ng Diyos at ng Kaharian, at siya din ang kinatawan ng mga tao. Siya ang tagapagdala ng biyaya, at ng paghuhukom. Kay Hesus magaganap ang ugnayan at pakikipagtalastasan ng Diyos at ng tao.

 

 

 

1/18/24

photo:  https://www.thenivbible.com/blog/the-son-of-man/

Labels:

Popular posts from this blog

MALI BA SI CARDINAL AMBO DAVID?

    Nagkagulo na naman ang mga Katolikong mabilis mataranta at ito ay dahil sa pahayag ni Cardinal Ambo David sa isang panayam na ibinigay niya sa isang conference. Nasabi kasi ng Cardinal ang ganito: “Huwag kayong maniniwala na ang kaligtasan ay para sa mga Katoliko lamang. Hindi ka Katoliko kung ang iniisip mo na ang maliligtas ay Katoliko lamang. Ang kaligtasan ay laan para sa lahat… sa buong sangkatauhan.”   Nag-alala ang ilan at naisip na baka daw maraming magsi-alisan sa pagiging Katoliko dahil maliligtas naman pala kahit hindi Katoliko. Baka din daw isipin ng ilang nagbabalak maging Katoliko na huwag ituloy dahil hindi naman pala ganoon kahalaga maging Katoliko. May mga nagalit, may mga nasaktan, may mga nagbintang na mali ang turo ng Cardinal tungkol dito.   Pero tingnan natin kung ganito ang sinabi ng Cardinal, magiging tama kaya ang lahat? Halimbawa ganito niya sinabi: “Maniwala kayo na tayong mga Katoliko lamang ang maliligtas...
Read more

Wala Ka nang Pag-asa?

    May mga pagkakataon bang nasabi mo sa sarili mo: Wala na akong pag-asa! Huli na ang lahat! Hindi na ako makakahabol! Wala nang magagawa pa! Hopeless situation na!   Subalit ang ganitong pakiramdam ay hindi tunay na pagkawala ng pag-asa. Natural sa mga tao ang manlumo (ma-depress sabi natin ngayon), dahil sa panghihinayang at pagkukulang. At sa mga panahong ganito ang damdamin natin, mas matingkad ang katotohanan na darating muli ang pag-asa at papalitan nito ang mga huwad na nagpapanggap na pag-asa – ang “sana” at ang “ok lahat.”   Ang “sana” (o mas palasak ngayon, “sanaol” ay katumbas ng tinatawag sa Ingles na “wishful thinking.” Ito iyong hinagap na makakamtan mo lahat ng hangarin mo; wala itong kinalaman sa pag-asa. “”Sana” tumama ako sa lotto; “sana” gumanda ang buhay ko ngayon.” Wala itong batayan sa katotohanan dahil ito ay isang guni-guni lamang. Mapalad ka kung maganap ang “sana” sa buhay mo.   Ang “ok lahat” ay katu...
Read more

MALASWA DIN!

    Kahanga-hanga itong si Cardinal Pablo David sa lahat ng mga obispo ng Pilipinas, lalo na sa hanay ng mga Kardinal na Pilipino. Bagamat ang ibang Kardinal at karamihan sa mga obispo ay tahimik sa mga suliranin ng bayan, mabilis naman tumutugon si Cardinal David sa mga kinakaharap na isyu ng Lipunan. Hindi mapigilang maalala ang halimbawa ng yumaong Jaime Cardinal Sin na buong tapang na tinuligsa ang mga pagpapahirap sa mga tao noong kanyang kapanahunan. Tila si Cardinal David ang siyang tagapamana ng budhing panlipunan na isinabuhay ni Cardinal Sin.   Nitong nakaraang mga araw, tinawag ni Cardinal David na “obscene,” o malaswa ang ugali ng mga mayayaman at maykaya at mga pamilya nila na ipagmayabang ang kanilang kayamanan sa social media: mga pagkaing sobrang mamahalin, mga koleksyon ng abubot na ginto ang halaga, mga pamamasyal at pamamahinga sa mga destinasyong sa pangarap lamang mararating ng marami. Napansin ang mga ito ng mga tao lalo na ...
Read more