Bihirang mangyari na nagtatapat ng araw ang Ash Wednesday at Valentine’s Day at ngayong 2024, magaganap ito. Ang labo pa naman ng kaugnayan ng dalawang araw na ito. Kapag Ash Wednesday, diyan natin maririnig ang paalala ng simbahan na tayo’y dapat mag-fasting and abstinence; konting sakripisyo, bawas sa layaw ng mata, tenga, bibig at katawan. Sa Miyerkules ng Abo, ang sagisag na taglay ng bawat Katolikong magsisimba ay walang iba kundi abo, na mula sa Bibliya ay tanda ng pagsisisi, pagbabalik-loob sa Diyos at pagsaksi sa pananampalataya.
Iba naman ang tanda ng Valentine’s Day, dahil nga kalimitan itinuturing itong araw ng mga nagmamahalan, ng mga mag-jowa, ng mga may forever. Para sa karamihan, ang mga tanda ng araw na ito ay chocolates, flowers, balloons, dinner date at kung anu-ano pang sweet nothings at pampakilig. Hindi maikakaila na biruan din ng maraming tao, at malamang na may katotohanan, na busy day din ito sa mga motel sa iba’t-ibang lugar sa bansa.
E paano nga kung Katoliko ka, matapat ka sa pagtupad sa taunang Ash Wednesday pero nasanay ka ding magdiwang ng Valentine’s Day? Maaari bang sabay na ipagdiwang ang galak, pag-ibig, at kilig at ang pagninilay, pagtitika, at pagsa-sakripisyo sa pasimula ng Kuwaresma?
Sabi ng
iba, madali namang agahan na lang o iurong na lang ang araw ng pag-ibig;
ginagawa na iyan ng marami kasi baduy na daw ngayon kung February 14 eksakto ka
magse-celebrate. At siyempre, ang Ash Wednesday, hindi maaaring palitan ng araw
iyan, dahil nasa kalendaryo na iyan ng simbahan; Miyerkoles talaga para sa "Latin" o "Roman rite." Pero naalala
ko lang, minsang nasa Australia ako, dahil may malaking football game sa isang
lugar at alam ng bishop na maaaring mas unahin ng tao ang sports kaysa church,
nagpasya siya na gawing Ash Tuesday para hindi magkaroon ng conflict ang sports
at ang gawaing simbahan. Kakaiba ang mga sekular na bansa kung saan hindi na
matingkad ang pagsasabuhay ng pananampalataya. Sa tinatawag na "Ambrosian Rite," na isa sa mga ritong Katoliko din, walang Ash Wednesday sa kanilang pagtupad sa Kuwaresma at nagsisimula ang panahong ito sa araw ng Linggo.
Sa diwa ng pagninilay, sa mga nais na magdasal, sa mga nagbibigay-puwang sa kanilang buhay pananampalataya, madaling makita ang kaugnayan ng dalawang pagdiriwang na ito. Ang Diyos ang siyang Panginoon ng pag-ibig at pakikipag-ugnayan; siya din ang Panginoong tumatawag sa ating bigyang-pansin ang pag-ibig na higit pa sa maibibigay ng mundong ito, ang pag-ibig na makakamit sa pamamagitan ng landas ng pagbabalik-loob at pagbabagong-buhay. Ang Diyos ang pinagmumulan ng pagkain, bulaklak, tsokolate, at pagka-akit natin sa isa’t-isa at siya din ang lumikha sa tao mula sa alabok at mag-aakay sa atin pabalik sa abo sa dulo ng ating buhay.
Ang Valentine’s Day ngayong taong ito, kasabay ng Ash Wednesday, ay napakagandang pagkakataon upang lubos na matanto natin ang kahulugan ng pag-ibig ng tao sa isa’t-isa, subalit higit sa lahat, ng pag-ibig ng Ama sa bawat isang nagmamahal at lumalapit sa kanya. Ang Valentine’s ay araw ng mga puso; ang Ash Wednesday ay tibok ng puso ng Panginoong Hesus para sa ating lahat. Ang kanyang wagas na pagmamahal ang batayan ng ating buhay at lahat ng ating tinatamasa. Hindi posible ang buhay kung wala ang pag-ibig na iyan.
Nasa kamay ang roses, nasa noo ang “ashes”… aba e, magdiwang na!
2/12/24
photo: https://www.oklahoman.com/story/news/religion/2018/02/10/feast-fast-that-question-wednesday-coinciding-with-valentines-means-meat-merriment-are-out-for-some/60544208007/