Naglabas ang simbahan ng mga bagong patakaran sa pagsusuri sa mga nababalitang aparisyon ng Mahal na Birhen at iba pang mga kababalaghang kaugnay ng pananampalataya ng mga tao at mga deboto (NORMS FOR PROCEEDING IN THE DISCERNMENT OF ALLEGED SUPERNATURAL PHENOMENA, Mayo 17, 2024). Sinabi dito na kailangan ang pag-iingat sa pag-aaral ng mga nasabing mga kaganapan upang hindi maligaw ang mga tao sa pananampalataya at magabayan sila sa tamang debosyon at paniniwala.
Sa mga bagong patakaran, may anim na maingat na pahayag o pasya ang maaaring ilapat sa mga napababalitang mahiwagang kaganapan matapos pag-aralan at suriin ang mga ito. Narito ang mga posibleng pasya:
NIHIL OBSTAT ("walang humahadlang"): Bagamat wala pang katiyakan sa pangyayari na magiging huling pasya ng simbahan, ang isang kababalaghan ay maaaring kakitaan ng mabuting ibubunga sa espirituwal at pastoral na buhay ng mga tao, at maaaring gawin ng isang obispo na tumulong upang mapalaganap ang isang debosyon, tulad ng pagpayag at paghikayat sa pagdalaw o pilgrimage sa lugar kung saan ito sinasabing nagaganap. Sa bandang huli, tanging ang Santo Papa lamang ang may karapatan at kapangyarihang magpahayag kung ang kaganapan ay tunay na maituturing na supernatural o mula sa Panginoong Diyos.
PRAE OCULIS HABEATUR ("kailangang magmasid"): Sa pasyang ito naman, may pagkilala sa mga positibong tanda na kalakip ng sinasabing aparisyon o himala, subalit may nakikita ding mga bagay na dapat pang kilatisin nang malaliman upang hindi magdulot ng kalituhan sa mga tao.
CURATUR ("binabantayan"): Sa pahayag na “curatur,” may napatunayan na mga mabubuting bungang espirituwal ang kaganapan at hindi makakabuting ipagbawal ang debosyon ng mga tao, pero ang obispo ng lugar ay hindi manghihikayat na tangkilikin ang sinasabing himala at sa halip ay dapat gumawa ng mga ibang paraan ng debosyon na makapag-aakay sa mga tao sa mas mayamang espirituwal at pastoral na pagpapayabong ng pananampalataya nila.
SUB MANDATO ("nasa ilalim ng pangangasiwa"): Ang pasyang ito ay ibibigay sa isang itinuturing na kababalaghan kung saan may tao, pamilya, o grupo na tiyak na gumagalaw sa likod ng pangyayari upang gamitin sa mali o kaya ay kasangkapanin ang mga tao para sa kanilang pansariling motibo.
PROHIBETUR ET OBSTRUATUR ("ipinagbabawal at hinahadlangan"): Dito ang pangyayaring napabalita ay mayroon ngang mabuting mga sangkap subalit mayroon ding mga seryosong panganib na kaakibat ng pagsunod o paniniwala sa kaganapan. Ang obispo ng lugar ay dapat gumawa ng hakbang upang maiwasan ang kalituhan o eskandalo, at magpahayag na hindi dapat paniwalaan ang kaganapan, kaya ipagbabawal niya ito. Dapat din siyang mabilis na gumawa ng paraan upang maturuan ang mga tao ng tamang katekesis at aral upang magabayan sila sa pang-unawa sa pasya niya at maakit sila sa higit na tamang espirituwal na landas.
DECLARATIO DE NON SUPERNATURALITATE ("pasya na ito'y hindi supernatural o mula sa Diyos"): Ang pasyang ito ay naglalaman ng konklusyon ng masusing pag-aaral kung saan napatunayan na ang sinasabing aparisyon o himala o kababalaghan ay hindi nag-uugat sa Diyos, at hindi isang milagro.
Nilinaw
ding ng dokumento na ang mga aparisyon, himala o kababalaghan, kahit pa ang mga
ito ay tinanggap at pinagtibay ng simbahan, ay hindi ang pinakamahalagang batayan
ng pananampalataya. Ang pagpapahayag ng Diyos sa pamamagitang ng kanyang Anak,
ang ating Panginoong Hesukristo ang kumpleto o ganap na pagbubunyag ng kalooban
ng Diyos at sapat na ito para sa lahat ng kailangang mabatid tungo sa
kaligtasan at kabanalan. Ang mga supernatural na pangyayari ay mga “tulong” lamang
upang mapalalim ang pananampalataya at pang-unawa ng mga tao sa kanilang pananampalataya
sa Diyos. Bahagi ang mga ito ng patuloy na pagkilos ng Espiritu Santo sa puso ng mga mananampalataya at sa buhay ng simbahan.
5/18/24
photo: https://media.ascensionpress.com/2020/05/30/the-ultimate-guide-to-marian-apparitions/