Napakaraming mga tao ngayon ang dumaranas ng mental health problems. Iba’t-iba ang uri ng karamdamang pangkaisipan: nariyan ang depresyon, anxiety o lubhang pagkabahala, stress disorder, eating disorder, iba’t-ibang adiksyon, pag-iisip ng suicide, at marami pang iba. Nakakalungkot lamang na marami din sa mga nagdurusa nito ang walang matakbuhan o makausap man lamang dahil kulang ang ating pang-unawa sa ganitong kalagayan.
Akala ng iba ay drama lamang ito. Sabi ng iba, iniisip lang daw ito. Lakasan lang daw ang loob o kaya tibayan ang pananampalataya. Mahirap pa, minsan sa pari dinadala para i-pray over. Walang masamang basbasan ng pari ang maysakit, subalit dapat tandaang hindi basbas ang magpapagaling sa taong ito kundi tulong na propesyunal tulad ng counseling, therapy at konsulta sa mga eksperto. Bahagi ang pananampalataya ng paggaling ng tao, dahil nagpapalakas ito ng loob at nagbibigay pag-asa, subalit nais ng Diyos na gamitin natin ang mga lunas na mula sa siyensya na siya din ang pinagmulan kung tutuusin. Lahat ng biyaya ng teknolohiya at agham ay kabutihang kasangkapan ng Diyos sa ating buhay.
Isa pang mahirap na binubuno ng mga may mental health problem ay iyong tinatawag na stigma o kalakip na pagpapahiya o pagturing ng negatibo sa kanila ng kapwa tao. sinasabing sira-ulo daw, may kulang sa turnilyo, nalipasan ng gutom, nasawi sa pag-ibig, nawalan ng bait, at iba pang uri ng masasakit na salita. Kaya tuloy ikinakahiya sila maging ng kanilang mga pamilya at pilit na itinatago sa iba, kung hindi man itaboy sa tahanan.
Sa mata ng pananampalataya, hindi dapat ganito ang turing sa mental health isyu. Noong 1996, sinabi ni St. Pope John Paul II na ang bawat taong ay karamdaman sa pag-iisip ay laging taglay pa din ang pagiging “kawangis ng Diyos.” Dahil dito, sila ay mga anak ng Diyos tulad ng lahat ng tao, at dapat igalang at ituring ng tama ayon sa puso ng Panginoon. Dapat daw silang tulungan at gabayan hanggang maka-ahon sa kondisyong ito dahil sila ay bahagi ng mga dukha na mahal ng Panginoon. Mismong ang Panginoong Hesukristo ang nagmahal at nagpagaling sa mga maysakit; ang kanilang paghihirap ay laging kaugnay ng paghihirap ng Panginoon para sa kaligtasan ng daigdig.
Sinabi naman ni Pope Benedict XVI na kailangang tulungan ang mga may mental health problem dahil lumalala ang situwasyong ito sa mundo ngayon; dumarami ang nakakaranas nito dahil sa mga pangyayari sa buhay at sa kasaysayan. Napansin niyang ang mga may karamdamang ganito ay lalong lantad sa pangungulila, sa kawalang ng suporta ng pamilya at Lipunan, at ang pagsasantabi at pagsasawalang-bahala sa kanila ng kapwa.
Sinabi naman ni Pope Francis na lahat ng nagdaranas ng mental health sickness ay tao pa din na minamahal at kinakalinga ng Diyos. Kahit pa anong pagkawasak ng buhay ng tao dahil sa bisyo, o maling pasya, o kagagawan ng iba, ang Diyos ay nasa puso pa din niya. Kahit libot daw ng tinik at dawag ang buhay ng isang taong may problema sa kaisipan, may mabuting binhi pa ding tutubo sa kanyang buhay.
Inamin ni Pope Francis at hindi niya ikinahiya na noong isa siyang bata-bata pang pari, siya mismo ay naghanap ng tulong ng isang psychologist upang makayanan niya ang mga pagsubok ng kanyang buhay bilang superior ng mga Jesuits sa Argentina. Nabawasan ang kanyang anxiety o lubhang pag-aalala at stress at naturuan siya kung paano ang tamang gawin sa pagharap sa mga situwasyon ng hamon sa buhay.
Hinimok niya ang lahat na huwag mahiya na humingi ng tulong kapag nakakaramdam ng anumang pagkabagabag sa isipan. Dapat din daw na ang mga pari ay magkaroon ng konting kaalaman sa psychology upang maunawaan ang pinagdadaanan ng mga taong may kondisyon sa mental health.
Sa bagong dokumentong Dignitas Infinita, sinabi dito na isa sa mga kailangang ayusin sa larangan ng dangal ng tao ay ang pagkabawas ng dangal dahil sa pagtataboy sa mga may mental health disability. Hindi dapat itapon, itaboy, o itago ang mga taong nagdurusa dahil sila ay kabilang sa mga pinaka-kawawa sa Lipunan. Walang anumang bahid ng imperfection ang maaaring bumura sa dangal ng isang tao.
Kaya kung ikaw ay may mental health problem ngayon, tandaan mong mahal ka ng Panginoon at nais niya ang iyong patuloy na paghilom ng puso, isip, at damdamin. Sana matagpuan mo ang mga taong makatutulong sa iyo. Huwag mawawalan ng pag-asa; huwag mawawalan ng pananampalataya. Pagpalain ka ng Panginoon!
6/24/2024
photo:https://www.washingtonpost.com/health/covid-pandemic-helped-depression/2020/10/09/59bfd000-e7a6-11ea-970a-64c73a1c2392_story.html