Ilang santo at santa ang inilahad ni Pope Francis na may kinalaman sa pagkalat ng debosyon sa Mahal na Puso nI Hesus, ayon sa kanyang 2024 encyclical na “Dilexit Nos,” isang liham tungkol sa pamimintuhong ito. Sinu-sino at ano ang kanilang kontribusyon sa kasalukuyang pamamanata ng mga tao sa Mahal na Puso?
SAN FRANCISCO DE SALES
Malaki ang ambag ni San Francisco de Sales sa debosyon sa Mahal na Puso ni Hesus. Madalas niyang pinagnilayan ang bukas na puso ni Kristo, na nag-aanyayang Manahan tayo sa kanya, sa personal na ugnayan ng pag-ibig. Nilabanan niya ang espiritualidad na batay sa mahigpit at istriktong moralidad at kabanalan sa pamamagitan ng paglalahad ng Puso ni Hesus na tumatawag sa atin na magtiwala, magpaubaya sa kanyang pagmamahal. Ayon sa kanya, nakasulat sa Puso ni Hesus ang lahat ng ating mga pangalan, dahil bitbit niya tayong lahat sa kanyang Puso. Kaya ang pag-ibig ng Panginoon ay hindi nakalutang sa alapaap kundi tunay na personal at nararamdaman, para sa bawat tao sa mundo. Dama natin sa Pusong ito ang pagkilala at paggalang ng Isang tunay na nagmamahal.
SANTA MARGARITA MARIA ALACOQUE
Si Santa Margarita Maria Alacoque ay anak na espirituwal ni San Francisco de Sales. Sa kanya, bilang mongha ng Visitation convent na itinatag si San Francisco de Sales at Sta. Juana de Chantal, nagpakita ang Panginoon mula Disyembre 1673 - Hunyo 1675. Sa unang aparisyon pa lamang, ipinahayag na ng Panginoon ang kanyang naglalagablab na pagmamahal sa mga tao, na nais niyang ibuhos sa buong daigdig upang makinabang ang lahat sa mga kayamanang angkin nito.
SAN CLAUDE DE LA COLOMBIERE
Ang gabay espirituwal ni Santa Margarita Maria ay si San Claude de la Colombiere. Sinuportahan niya ang mongha at ipinakilala ang debosyon sa Mahal na Puso ni Hesus kalakip ang paliwanag sa mas malalim na pang-unawa dito, lalo na sa liwanag ng Mabuting Balita. Hindi dapat tuluyang maging tamad at pabayaan na lang ang biyaya ng Diyos o maging sobrang mapaniwala sa sariling lakas, kundi dapat ang malayang pagsuko kay Kristo na nagdadala ng kapayapaan, katiyakan at mabuting pasya sa ating buhay.
SAN CARLOS DE FOUCAULD
Si San Carlos de Foucauld ay nasanay sa pagdalaw sa Banal na Sakramento at minsang ipinakita ng kanyang pinsang si Marie de Bondy ang isang larawan ng Mahal na Puso, nabuhay sa kanya ang kamulatan sa pagmamahal ni Hesus. Ito ang naging pinakamahalaga sa kanya, ang debosyon sa Puso ni Hesus, na nag-uumapaw sa awa sa mga dukha at mga makasalanan. Inialay niyang buong-buo ang sarili niya sa Mahal na Puso ni Hesus, na batid niya ay walang hangganan ang pag-irog. Nang dumating ang panahon na dahil mag-isa lamang siya at hindi maaaring makapag-Misa noong panahong iyon, hinayaan niyang manahan sa kanyang kalooban ang Mahal na Puso upang manatili doon tulad nang pananatili ni Hesus sa Nasaret. Tinularan ni San Carlos de Foucauld ang Puso ni Hesus at nabuhay siyang dukha at handang mag-alay ng buhay para sa kapwa hanggang sa kanyang kamatayan.
SANTA TERESITA NG BATANG HESUS
Si Santa Teresita ng Batang Hesus o St. Therese of Lisieux ay nagkaroon ng debosyon sa Mahal na Puso dahil ang pamilya niya ay natulungan ng kanilang gabay-espirituwal na si Fr. Almire Pichon, na kilalang deboto at alagad ng Mahal na Puso. Sa murang edad, alam niyang ang puso niya ay kaisa ng tibok ng Puso ng Panginoon. Sa panalangin, itinuring niya na kabiyak ng puso niya ang Mahal na Puso ni Hesus na pinanabikan niyang makaharap balang araw. Ang pinakamahalagang pagninilay ni Sta. Teresita sa Mahal na Puso ay ang kanyang pagkilala ng napakalalim na pagmamahal at habag ng Panginoon para sa mga makasalanan, na nais niyang patawarin at basbasan kung lalapit lamang ang mga ito sa kanya. Anumang dami ng kasalanan ay tila isang patak lamang ng tubig na kakainin ng masidhing alab ng pagmamahal ng Diyos.
Tularan din sana natin ang mga banal na taong ito na hanapin, yakapin, tanggapin, at pagyamanin ang pamamanata sa Mahal na Puso ng Panginoong Hesukristo na siyang larawan ng nag-uumapaw at dumadaloy na pag-ibig ng Ama, Anak at Espiritu Santo.
11/5/24
photo: ctto